كملت سنين بعدد حبات السبحة النهاردة.. يارب قدرني أسبحك وأحمدك وأشكرككلاكيت 33 مرة: عدت يا يوم مولدي
+3
من صغري كانت كل أحلامي والمستقبل بشكل عام لغاية سن 30 بس.. عمري ما تخيلت إني عايش بعد الـ 30.. مش تشاؤم ولا حاجة وحشة.. بس هو ده إحساسي لسنين طويلة جداً ومعرفشي ليه
يمكن من صغري حاسس إن 30 سنة كفاية جداً ف الدنيا دي.. جايز ..
تورتة مدرسية
أما كنت شغال في مدرسة رواد المستقبل .. في أوضة تصحيح الإنجليزي كان بيتنصب سيرك يومي أبطاله المصحين والمصححات طول اليوم. وسبحان الله الشغل ماشي بمعدلات صاروخية.. يمكن عشان الصحبة والروح الجميلة اللي كانت بينا.
في يوم لقيت آنسة ومدام من الزميلات متزعمين حركة مش فاهمها ومرضيوش يقولولي... تاني يوم فهمت لقيت القسم كله اشترك في عمل حفلة واتضح إنه كان يوم ميلادي
المشكلة إني كنت تعبان يومها لدرجة إني مقدرتش آكل ولا أشرب .. والكل شارك من أول صاحبة المدرسة اللي رمت صواريخ ف الأوضة !!! ما عدا واحد زميل نرفزني.. جاي يقولي إن ده بدعة.. قلتلو كل الناس الموجودة كبار وعارفين إنو مفيش إلا عيدين بس.. لكن الفكرة مش ف الاحتفال نفسه الفكرة في قيمته.. لقيته زعل وخرج م الأوضة.. اللي يغيظ إنو رجع وأكل م التورتة وأنا عشان كنت تعبان ما أكلتش منها !!!
أحمد إبراهيم
من التهاني السنوية بيوم ميلادي تهنئة أحمد صديقي اللي اتعرفت بيه من أيام ثانوي.. من مواليد نفس الشهر..
السنادي راح احمد.. راح بهدوء على غير ما اتعودنا منه
كان اكتر واحد طموح في المجموعة.. أكتر واحد بيفكر في الدنيا، وكمان أكتر واحد بيفكر في اللي بعدها..
أفكاره ومشاريعه كانت فعلاً مبهرة وابتدا ينفذها بعقلية رجل أعمال قبل مايكون محامي
وفي نفس الوقت كانت عنده روحانيات جميلة.. أما يتكلم في الزهد تنسى تماماً البزنس مان.. وده عشان الصدق بتاعه
في هدوء.. بعيد عن الأهل والأصدقاء.. في الغردقة مركز أعماله.. نفذ قضاء الله وهو نايم .. الله يرحمه
أكيد أكيد.. هيوحشني
