أم البراءة جودي جنب أختها روانلو جودي ماسابتش مين هايسيب.. انت بس اديها أول خمس دقايق للاستكشاف هاتلاقي قدامك ملااااااااااااااك برئ وبعد كده هاتلاقي العلامة ف بيتك وف وشك وف كبرياءك اللي بتهوي تدشدشه
جودي بنت زميلة وصديقة وهي -البنت مش الأم- عندها 3 سنين بس وأزعة لكن جبااااااااااارة
جت شكوى من زميلة مامتها ف المدرسة إنها في فصل كي جي بتشتم زمايلها ومدرسينها.. مامتها ف البيت بتقولها: يا جوجو مينفعش نشتم صحابنا صح؟ بكل براءة ردت: ولا الميس يا ماما!!!!!
اول يوم دراسه قالت لمامتها وهي بتلبسها: ماما هو انا رايحه المدرسه؟؟؟ قالتلها اه يا جودي ردت و قالت: طب اللي هايقولي ذاكري هقطعه!!!
م الباب للطاق راحت لباباها وقالتلو: بابا.. لو مبطلتش تدخين هتموت وماما تجيبلنا بابا غيرك.. طبعاً هاج وماج في ماما اللي حلفت بكل الكتب المقدسة إنها منطقتش حرف واحد .. وطبعا جوجو البريئة ولا قطنة مدام نظيفة: مبتكدبش
في بيت جدتها مكانش ليها هدوم تقعد بيها .. الست جابت لها بادي كان عندها طبعاً بقالها فستان وكان لونه أبيض.. جدها رجع م الشغل: ايه اللي انتي لابساه يا جودي.. بنفس البراءة: تيتة لبستني كيس المخدة!!! ونفس السيناريو الجد راح للمدام يزعق إزاي تعمل كده. ويقولوا ايه علينا.. ونظرات البراءة لسه على وش جوجو
نص المدرسة كانت بتتجنب مامتها تجنباً للاحتكاك بالمعلمة جودي.. لكن على مين: كنت كاسر عينها .. كل يوم أديلها بونبوناية وتسلم وتبوس كمان. بس للأمانة مكانتش بتعمل كده إلا أما البنبوناية تبقى ف بقها.. أما واحد زميلنا مكانش بيدفع الإتاوة كانت مفرجة عليه أمة لا إله إلا الله وأمة الثالوث.. مرة سمعتنا بنقولوا يا منوفي.. وبعلو صوتها (يا منيييييوفي)
سمعتها تعدت الحدود.. عم مامتها ف الكويت شافلها صورة على الفيس بوك وهي واقفة في طابور في المدرسة كتب تعليق:
بواسطة (........) : 03 مارس الساعة 10:03 صباحاً
جودي وهي تقود مظاهرة طلابية تدعو فيها باغلاق المدرسة و تعطيل التلاميذ .....علشان تصدقو ني يا ناس ان البنت دية من اهم اسباب تدني الحالة التعليمية في بر مصر ....مناشدة اوجهها لكل المسئولين عن التعليم أأمل ان تأخذ بعين الاعتبار
جودي وهي تقود مظاهرة طلابية تدعو فيها باغلاق المدرسة و تعطيل التلاميذ .....علشان تصدقو ني يا ناس ان البنت دية من اهم اسباب تدني الحالة التعليمية في بر مصر ....مناشدة اوجهها لكل المسئولين عن التعليم أأمل ان تأخذ بعين الاعتبار
جودي بعد مرور سنة كاملة في التعليم متعرفش تفرق بين العربي ولاإنجلش يعني تبص على حرف (ط) وتقول عليه (F)
حار العلم الحديث في ظاهرة البنت دي.. قالوا بس الحل نقول إنها وراثة.. لكن أغمى عليهم أما شافوا أختها الكبيرة.. روان.. نسمة ياخواتي .. وماشاء الله عليها غاوية تعليم لدرجة إنها بتألف مسائل عشان تحلها.. وبطلتنا الهمامة تخليها تسهي شوية ترجع تلاقي كراساتها طيارات ومراكب..
ربنا يحفظهم ويحميهم من كل سوء (على فكرة دي مش جلسة غيبة. دي نميمة لأنها بموافقة مامتهم)
ليست هناك تعليقات:
إرسال تعليق